آمدن سے زائد اثاثہ کیس؛ رانا ثناءاللہ کی نیب تحقیقات ختم کرنے کی درخواست منظور

عدالت نے رانا ثناءاللہ کی آمدن سے زائد اثاثوں کی نیب انوسٹی گیشن ختم کرنے کی درخواست منظور کرلی۔

لاہورہائی کورٹ میں وفاقی وزیر داخلہ رانا ثنااللہ کی آمدن سے زائد اثاثوں کی نیب انکوائری کے خلاف درخواست پر سماعت ہوئی، جسٹس علی باقر نجفی کی سربراہی میں دو رکنی بنچ نے درخواست پر سماعت کی۔

نیب وکیل فیصل بخاری نے عدالت میں مؤقف اختیار کیا کہ عدالتی حکم پر نیب نے جواب لاہور ہائیکورٹ میں جمع کرا دیا ہے۔

رانا ثنااللہ کے وکیل امجد پرویز کا کہنا تھا کہ اے این ایف نے رانا ثناءاللہ کو منشیات کیس میں گرفتار کیا، ہائی کورٹ سے ان کی ضمانت ہوئی، اے این ایف نے کہا رانا ثناءاللہ نے ساری جائیداد منشیات کے کاروبار سے بنائی ہے۔

امجد پرویز نے بتایا کہ نیب کے مطابق رانا ثناءاللہ نے اثاثے کرپشن سے بنائے ہیں، نیب نے بھی جائیداد کی چھان بین کے لیے نوٹس بھیجا جسے عدالت میں چیلنج کیا گیا۔

جسٹس علی باقر نجفی نے استفسار کیا کہ نیب کی تحقیقات کہاں تک پہنچی ہیں۔ نیب وکیل فیصل بخاری نے جواب دیا کہ نیب ابھی تحقیقات کر رہا ہے، تحقیقات جاری ہیں۔

لاہور ہائیکورٹ نے رانا ثناءاللہ کی آمدن سے زائد اثاثوں کی نیب انوسٹی گیشن ختم کرنے کی درخواست منظور کرلی، اور آمدن سے زائد اثاثوں کا کیس بند کر دیا۔

واضح رہے کہ رانا ثنا اللہ نے نیب انویسٹی گیشن خارج کرانے کیلئے ہائیکورٹ سے رجوع کیا تھا۔

from Samaa - Latest News https://ift.tt/IdplQzf