چیئرمین پی ٹی ائی اور فواد چوہدری کے ناقابل ضمانت وارنٹ جاری

الیکشن کمیشن نے توہین ای سی پی کیس میں چیئرمین پی ٹی آئی اور فواد چوہدری کے ناقابل ضمانت وارنٹ جاری کردیئے۔

الیکشن کمیشن آف پاکستان کے 4 رکنی کمیشن کے سامنے سابق وزیراعظم اور چیئرمین پی ٹی آئی عمران خان سمیت دیگر رہنماؤں کیخلاف توہین ای سی پی کیس کی سماعت ہوئی۔

چیئرمین پی ٹی آئی عمران خان، سابق وفاقی وزراء فواد چوہدری اور اسد عمر آج بھی پیش نہ ہوئے، ای سی پی نے سابق وزیراعظم اور فواد چوہدری کے ناقابل ضمانت وارنٹ جاری کردیئے۔

معاون وکیل نے کمیشن کو بتایا کہ اسد عمر کے کیسز ہیں اور ڈاکٹر کے پاس چیک اپ کیلئے بھی جانا تھا، حاضری سے استثنیٰ دے دیں، اسد عمر پہلے حاضر ہوتے رہے ہیں۔

ممبر الیکشن کمیشن نے اسد عمر کے معاون وکیل کو ہدایت کی کہ درخواست جمع کرادیں۔

معاون وکیل نے بتایا کہ فواد چوہدری لاہور جبکہ فیصل چوہدری اسلام آباد ہائیکورٹ میں ہیں، فیصل چوہدری نے الیکشن کمیشن آنے کا کہا ہے۔

معاملے کا پس منظر

پی ٹی آئی حکومت کے آخری دنوں سے سابق وزیراعظم عمران خان اور ان کے رفقاء کی جانب سے الیکشن کمیشن پر شدید تنقید کا آغاز ہوا تاہم گزشتہ برس اگست کے بعد سے اس میں شدت آگئی تھی۔

عمران خان، فواد چوہدری اور اسد عمر سمیت کئی رہنماؤں نے الیکشن کمیشن اور موجودہ چیف الیکشن کمشنر کے خلاف انتہائی سخت زبان استعمال کی۔

مزید تفصیلات جانیے : توہین الیکشن کمیشن کیس؛ اسد عمر نے معافی مانگ لی

اسی دوران الیکشن کمیشن نے عمران خان، فواد چوہدری اور اسد عمر کو توہین الیکشن کمیشن کا نوٹس بھی جاری کیا۔

رواں برس 10 جنوری کو الیکشن کمیشن اسی معاملے میں عمران خان، اسد عمر اور فواد چوہدری کے قابل ضمانت وارنٹ گرفتاری بھی جاری کئے تھے۔

الیکشن کمیشن آف پاکستان توہین الیکشن کمیشن و توہین چیف الیکشن کمشنر کیس میں سابق وزیراعظم عمران خان، فواد چوہدری اور اسد عمر کے جواب مسترد کرچکا ہے۔

عمران خان کا جواب میں مؤقف کیا تھا؟

عمران خان نے اپنا تحریری جواب الیکشن کمیشن میں جمع کرایا، جس میں الیکشن کمیشن کے دائرہ اختیار اور نوٹس کو چلینج کرتے ہوئے مؤقف اپنایا گیا کہ انہیں بھیجا گیا نوٹس آئین کے خلاف ہے۔

پی ٹی آئی چیئرمین نے مزید کہا کہ الیکشن کمیشن کی توہین نہیں کی بلکہ ای سی پی کے کردار پر خدشات کا اظہار کیا ہے۔

from Samaa - Latest News https://ift.tt/cLN97nR