پی ٹی آئی کیخلاف مقدمات حکومت نے درج نہیں کرائے،وزیرداخلہ

وفاقی وزیر داخلہ رانا ثنا اللہ کا کہنا ہے کہ پی ٹی آئی کے خلاف مقدمات حکومت نے درج نہیں کرائے، حکومت اس میں فریق نہیں ہے۔ تحریک انصاف کی حکومت اور عمران خان کسی سازش سے نہیں، اپنے کرتوتوں کی وجہ سے باہر ہوئے۔

فیصل آباد میں پریس کانفرنس کرتے ہوئے وفاقی وزیر داخلہ راناط ثنا اللہ کا کہنا تھا کہ یہ لوگ ( پاکستان تحریک انصاف ) کسی سازش سے نہیں بلکہ اپنے کرتوتوں کی وجہ سے باہر ہوئے ہیں، ان لوگوں نے ملک میں مہنگائی کا طوفان برپا کیا، اللہ تعالیٰ ہمیں معیشت کو بہتر کرنے کی توفیق دے۔ عام انتخابات سے متعلق ان کا کہنا تھا کہ الیکشن اپنے وقت پر اگلے 12 سے 14 ماہ میں انتخابات ہوں گے۔

سابق دور حکومت پر تنقید کرتے ہوئے ان کا کہنا تھا کہ پاکستان اس وقت مشکل حالات سے دوچار ہے، یہ لوگ کسی سازش سے نہیں بلکہ اپنے کرتوتوں کی وجہ سے باہر ہوئے ہیں، ان کے اتحادی بھی ان کی وجہ سے پریشان تھے، ہم کوشش کر رہے ہیں کہ بہتری کی طرف سفر کا آغاز کریں۔ ایک نئے مینڈیٹ اور دورانیے کے ساتھ عوام کی خدمت کریں گے، ان کے دور میں کوئی بھی منصوبہ بنایا گیا؟۔

ان کا کہنا ہے کہ میرے خلاف فتوے دیئے گئے، میرے گھر کا گھیراؤ کیا گیا، میاں نواز شریف پر لاہور میں حملہ ہوا، نواز شریف پر حملہ ہوا تو انہوں نے کوئی مذمت نہیں کی تھی، ہم کسی کیس میں مدعی نہیں ہیں۔ وزیر داخلہ نے پی ٹی آئی قائدین سے اپیل کرتے ہوئے کہا کہ میں ان کی قیادت سے اپیل کرتا ہوں کہ مدینہ میں ہونے والے واقعہ کی مذمت کریں، روضہ رسولﷺ پر جو واقعہ ہوا وہ دلخراش ہے، برطانیہ میں جتنے احتجاج ہوئے اس کو صاحبزادہ جہانگیر مینج کرتا رہا ہے۔

پاکستان تحریک انصاف کے گزشتہ روز ہونے والے احتجاج پر ان کا کہنا تھا کہ 74سالہ تاریخ میں چاند رات کو کوئی احتجاج نہیں ہوا، چاند رات تو محبت پیغام ہے لوگ ایک دوسرے سے ملتے ہیں، بعض لوگوں نے عمران خان کے بہکاوے میں آکر احتجاج کیا، درجن سے زیادہ لوگ باہر نہیں آئے جس پر انہیں شرم آنی چاہیے۔ تاریخ میں کوئی ایسا بدبخت لیڈر نہیں آیا، جس نے چاند رات کو بھی احتجاج کیا ہو۔

from SAMAA https://ift.tt/82nBj7P