اقوام متحدہ نے پاکستان کی امداد میں 5 گنا اضافہ کردیا

اقوام متحدہ کی جانب سے سیلاب متاثرین کی مدد اور بحالی کیلئے پاکستان کو دی جانے والی انسانی امداد کی اپیل میں 5 گنا اضافہ کر دیا گیا ہے۔

برطانوی خبر رساں ایجنسی روائٹرز کے مطابق اقوام متحدہ کی جانب سے پاکستان کو دی جانے والی امداد کو 16 کروڑ ڈالر سے بڑھا کر 81 کروڑ 60 لاکھ ڈالر کیا گیا ہے۔ یو این حکام کے مطابق صورت حال پر قابو پانے کیلئے 816 ملین ڈالر درکار ہیں۔

واضح رہے کہ پاکستان میں آنے والے رواں سال مون سون کی شدید بارشوں اور گلیشیر پگھلنے کی وجہ سے آنے والے بدترین سیلاب کی وجہ سے تقریباً 1700 افراد جاں بحق ہوچکے ہیں۔ پاکستان کئی دہائیوں میں آنے والے بدترین سیلاب کے بعد پانی سے پیدا ہونے والی بیماریوں کے پھیلاؤ پر قابو پانے کی کوشش کر رہا ہے، حکومت پاکستان اوراقوام متحدہ کا کہنا ہے کہ سیلاب کا سبب موسمیاتی تبدیلی ہے۔

پاکستان کے لئے اقوام متحدہ کے رابطہ افسر جولین ہارنائس نے جنیوا میں بریفنگ کے دوران بتایا کہ اقوام متحدہ نے پاکستان کیلئے اپنی انسانی ہمدری کی بنیاد پر امداد کی اپیل کو 16 کروڑ ڈالر سے پانچ گنا بڑھا کر 81 کروڑ 60 لاکھ ڈالر کر دیا ہے۔ ہم موت اور تباہی کے دوسرے مرحلے میں داخل ہو رہے ہیں۔

انہوں نے کہا کہ اگر ہم نے متاثرہ علاقوں میں صحت، غذا، پانی اور صفائی کی خدمات کی فراہمی میں اضافے کے لئے حکومت کی مدد کرنے کی خاطر تیزی سے کام نہ کیا تو بچوں کی بیماریوں میں اضافہ ہوگا اور یہ بہت خوفناک ہوگا۔

from Samaa - Latest News https://ift.tt/fO1rkI6