کراچی یونیورسٹی خودکش حملہ،ماسٹر مائنڈ کا جسمانی ریمانڈ منظور

کراچی کی انسدادِ دہشت گردی کی عدالت نے کراچی یونی ورسٹی میں ہونے والے چینی باشندوں پر خود کش حملہ کے ماسٹر مائنڈ اور سہولت کار داد بخش کا جسمانی ریمانڈ منظور کرلیا ہے۔

کراچی کی انسدادِ دہشت گردی کی عدالت کے منتظم جج نے منگل 5 جولائی کو کراچی یونیورسٹی میں ہونے والے چینی باشندوں پر خود کش حملہ کیس کی سماعت کی۔

دورانِ سماعت پولیس نے گرفتار مبینہ سہولت کار اور ماسٹر مائنڈ ملزم داد بخش کو عدالت میں پیش کر دیا۔

پولیس نے عدالت کو بتایا ہے کہ دہشت گرد بی ایل اے اور بی ایل ایف کراچی کا جنگجو ہے اور کراچی یونیورسٹی میں چینی اساتذہ پر خود کش حملے کا ماسٹر مائنڈ ہے۔

پولیس کا یہ بھی کہنا ہے کہ ملزم کراچی میں چینی باشندوں پر حملوں میں سہولت کاری کا کام کرتا تھا، ملزم کو گزشتہ روز سی ٹی ڈی نے گرفتار کیا تھا۔

عدالت نے ملزم داد بخش کو 16 جولائی تک جسمانی ریمانڈ پر پولیس کی تحویل میں دے دیا۔ واضح رہے کہ رواں برس 26 اپریل کو خاتون خودکش بمبار نے جامعہ کراچی میں چینی اساتذہ کی وین کے قریب خود کو دھماکے سے اڑا لیا تھا۔

خود کش حملے کے نتیجے میں 3 چینی اساتذہ سمیت 4 افراد ہلاک ہوئے تھے۔

from Samaa - Latest News https://ift.tt/opP0gGY